जाई कोरोना - कविता

भइया छोड़ि दा रोना-धोना 

लग्गी टीका जाई कोरोना 

जिन भागा चला हाथ बढ़ावा 

टिकवइयन से बोला लगावा 

लगवा के सूई सुनि ल पहिले

अउरी सभन के जा सहकावा

बन्नल तब्बै रही चोना-मोना

लग्गी टीका जाई कोरोना

त रही बहुरिया तूहूं रहबा 

जिउ जवन चाही ऊहै करबा 

न कारन करि-करि केहू रोई 

जिनगी जेतना चाही जियबा

चल्ली ना फेरु केहू क टोना

लग्गी टीका जाई कोरोना 

कहा लगवाके सबसे आके

रहीमा रजुई चुम्मन बाँके 

किछु हेन-तेन न घोखैं सगरी

धउड़ैं जल्दी लगवावैं जाके 

त रीन्हें चाउर अउर निमोना

लग्गी टीका जाई कोरोना

अउर सभन के एक ना जूरल 

हमनी क दुद्दू दुद्दू गो पूरल 

सगर जगत हमनिये से पाई

हमन के हण्डा वैक्सीन चूरल 

बगैर टीका लगल केहू हो ना

लग्गी टीका जाई कोरोना 

सहकावा-उकसाइये 

चोना-मोना - प्यार-मोहब्बत

बहुरिया- पत्नी

हेन-तेन - आनाकानी

रीन्हना- पकाना

डॉ. एम.डी.सिंह

पीरनगर, गाजीपुर (यू.पी.)